برطانیہ میں مقیم پاکستانی اور کشمیری کمیونٹی کے لیے ایک بڑی اور قابلِ فخر خبر سامنے آئی ہے۔ برطانوی شہر نیلسن سے
تعلق رکھنے والی 20 سالہ پاکستانی نژاد دوشیزہ فلک راجہ کو دولتِ مشترکہ (کامن ویلتھ) کے لیے برطانیہ کی ‘نوجوان سفیر منتخب کر لیا گیا ہے۔
فلک راجہ ‘یوتھ کونسل یوکے’ کے نئے تشکیل پانے والے ایگزیکٹو بورڈ میں شامل ان چار اہم ترین نوجوان سفیروں میں سے ایک ہیں، جو اب عالمی اور بین الاقوامی فورمز پر دنیا بھر کے نوجوانوں کے مسائل، حقوق اور ان کی امنگوں کی ترجمانی کریں گی۔
فلک راجہ کا انتخاب ان 19 ممتاز نوجوان رہنماؤں (عمریں 16 سے 25 سال) میں ہوا ہے جو یوتھ کونسل یوکے کے انتظامی بورڈ کی باقاعدہ قیادت سنبھال رہے ہیں۔ یہ بااثر کونسل برطانیہ، کراؤن ڈیپنڈنسیز اور اوورسیز ٹیریٹریز میں کام کرنے والی 200 سے زائد نوجوان تنظیموں کے ایک بہت بڑے نیٹ ورک کو آپریٹ کرتی ہے، جس کا دائرہ کار براہِ راست تقریباً 78 لاکھ نوجوانوں تک پھیلا ہوا ہے۔
اس تاریخی کامیابی اور منفرد اعزاز پر اپنے جذبات کا اظہار کرتے ہوئے فلک راجہ کا کہنا تھا کہ وہ اس منصب پر فخر کے ساتھ ساتھ عاجزی کا احساس بھی محسوس کر رہی ہیں۔ انہوں نے اپنے عزم کو دہراتے ہوئے کہا
“میری زندگی کا اولین مقصد ہمیشہ سے تعلیم کا فروغ اور سماجی انصاف کے ذریعے معاشرے میں مثبت تبدیلی لانا رہا ہے۔ برطانیہ اور دنیا بھر کے نوجوانوں سے میرا یہ وعدہ ہے کہ میں ان کی آواز بن کر انتھک محنت کروں گی، تاکہ نوجوان طبقہ محض مشوروں تک محدود نہ رہے بلکہ عملی تبدیلی کا اصل محرک بن کر ابھرے۔