ہمیں اپنے مخالف فریق کا موقف بھی سننا چاہیے، فیصل جاوید

تحریک انصاف (پی ٹی آئی) کے سینیٹر فیصل جاوید نے کہا ہے کہ ہمیں اپنے مخالف فریق کا موقف بھی سننا چاہیے۔

اسلام آباد میں تقریب سے خطاب میں فیصل جاوید نے کہا کہ بات قائل ہونے کی ہو تو قائل ہوجائیں نہ کہ ایک جگہ پھنس کر اڑے رہیں۔

انہوں نے کہا کہ الیکشن کمیشن اور سیاسی جماعتیں سب مل کر انتخابی نظام ٹھیک کریں، اتفاق رائے پیدا کیا جائے، یہ نہ ہو کہ ایک جگہ پھنس کر اڑے رہیں۔

پی ٹی آئی سینیٹر نے مزید کہا کہ الیکٹرانک ووٹنگ مشین کا استعمال نا گزیر ہے، ووٹنگ مشین کا مقصد شفاف الیکشن کرانا ہے۔

اُن کا کہنا تھا کہ جیتنے والا یہ سمجھے میرٹ پر جیتا اور ہارنے والا اپنی شکست کو باوقار انداز سے تسلیم کرے۔

فیصل جاوید نے یہ بھی کہا کہ عمران خان کرکٹ کی دنیا میں بھی نیوٹرل ایمپائر لائے، وہ اپنی پارٹی کے 20 ایم پی ایز کو کرپشن پر فارغ کرچکے۔

پروگرام: صبح بخیر، میزبان: ارشد بہزاد اور ڈاکٹر سمیرا خان

انہوں نے کہا کہ عمران خان نے صاف اور شفاف الیکشن کے لیے 126 دن کا دھرنا دیا، جسٹس ناصر الملک کی قیادت میں جوڈیشل کمیشن بنا، جس نے اپنی رپورٹ دی۔

پی ٹی آئی سینیٹر نے کہا کہ الیکشن کمیشن، سیاسی جماعتیں سب مل کر الیکشن کے نظام کو ٹھیک کریں، سب کی رائے کا احترام کیا جائے اور مشاورت میں کوئی ایک بھی باہر نہ ہو، اتفاق رائے پیدا کیا جائے۔