معروف عالم دین اور مبلغ مولانا طارق جمیل نے برانڈ کے بعد ایمبولینس سروس کا آغاز کردیا ہے ۔

تفصیلات کے مطابق انسٹاگرام پر ایم ٹی جے فاونڈیشن کے پیج پر ایمبولنس سروس کی مختلف تصاویر شیئر کرتے ہوئے سروس شروع کرنے کا اعلان کیا گیا ہے۔ انسٹاگرام پر وائرل تصاویر میں مولانا طارق جمیل کو بھی ایمبولینس سروس کا دورہ کرتے ہوئے دیکھا جاسکتا ہے۔

https://www.instagram.com/p/CPF9IB_hR7g/?utm_source=ig_web_copy_link

فاونڈیشن کی جانب سے شیئر کی گئی پوسٹ میں ان افراد کا بھی شکریہ اداکیا گیا ہے جنہوں نے ضرورت مندوں کے لیے ایمبولینس سروس کی فراہمی میں تعاون کیا۔خیال رہے کہ اس سے قبل مولانا طارق جمیل کی جانب سے برانڈ بھی لانچ کی جاچکی ہے۔ برانڈ لانچنگ کے حوالے سے مولانا طارق جمیل کا کہنا تھا کہ وہ یہ برانڈ کسی کاروباری نیت یا کسی کے مقابلے میں لانچ نہیں کر رہے بلکہ مدارس کو پاوں پر کھڑا کرنے کیلئے ایسا کیا جارہا ہے۔

نئی دلی انڈیا سے تعلق رکھنے والے معروف عالم دین مولانا وحید الدین خان علالت کے باعث انتقال کرگئے۔

بھارتی میڈیا کے مطابق مولانا وحید الدین خان کی عمر 96 برس تھی اور وہ نئی دلی کے ایک نجی ہسپتال میں زیر علاج تھے۔ انہوں نے پسماندگان میں دو بیٹے اور دو بیٹیاں چھوڑی ہیں۔

مولانا وحیدالدین خان نے اپنی زندگی میں درجنوں کتابیں تصنیف کیں، انہوں نے قرآن کریم کی تفسیر بھی لکھی۔ وہ طویل عرصے تک جمعیت علماء ہند سے بھی وابستہ رہے۔ ان کی علمی خدمات کے باعث بھارتی حکومت نے انہیں دوسرے اعلیٰ ترین سول ایوارڈ پدما وی بھوشن سے نوازا تھا

وفاقی وزیر مذہبی امور نور الحق قادری نے ناموس رسالت صلی اللّٰہ علیہ وسلم پر طلب گئے قومی اسمبلی اجلاس میں مسلم لیگ (ن) کو ہدف تنقید بنالیا۔

قومی اسمبلی اجلاس سے پالیسی خطاب میں نور الحق قادری نے کہا کہ ناموس رسالت صلی اللّٰہ علیہ وسلم کا محافظ پاکستان کا آئین و قانون ہے، اپوزیشن نے ایوان میں ایک گھنٹے کی بات کی یہ دو تین دن لے لیں۔

انہوں نے کہا کہ ایوان میں بیٹھے اراکین اور سڑکوں پر احتجاج کرنے والے پاکستانیوں کے طریقہ کار میں اختلاف ہوسکتا ہے۔

وفاقی وزیر مذہبی امور نے مزید کہا کہ ہمارےمقصد اور منزل پر کوئی اختلاف نہیں، ناموس رسالت کا محافظ پاکستان کا آئین و قانون ہے۔

اُن کا کہنا تھا کہ قرارداد کا پس منظر ہے جس کا اشارہ کرچکا ہوں، جس سے معاہد ہ ہوا، اس تنظیم میں شامل لوگ پاکستان کے شہری ہیں۔

نور الحق قادری نے یہ بھی کہا کہ اس تنظیم کی بہت سی مذہبی جماعتوں نے حمایت کی ہے۔

انہوں نے کہا کہ وزیراعظم عمران خان نے ناموس رسالت صلی اللّٰہ علیہ وسلم کے لئے بہترین سفارتکاری کی ہے۔

وفاقی وزیر نے کہا کہ عمران خان نے دنیا کے کونے کونے تک اسلام کا پیغام پہنچایا ہے، ناموس رسالت صلی  اللّٰہ علیہ وسلم سے ان کا گہرا تعلق ہے۔

ان کا کہنا تھا کہ جو تعلق عمران خان کا ناموس رسالت صلی  اللّٰہ علیہ وسلم سے ہے، وہ نہ کسی پیر کا ہے، نہ کسی مولوی کا ہے۔

نور الحق قادری نے کہا کہ مدینہ شریف میں ننگے پیر صرف عمران خان چلا ہے، ن لیگ کا ان کے دور حکومت میں اس معاملے پر طرز عمل دیکھ چکے ہیں

فرانس کے سفیر کو ملک سے نکالنے سے متعلق قرارداد قومی اسمبلی میں پیش کی گئی جبکہ ایوان میں اس سے متعلق اراکین نے اظہارِ خیال بھی کیا۔ 

اسپیکر قومی اسمبلی اسد قیصر کی زیرِ صدارت قومی اسمبلی کا اجلاس ہوا جس میں رکن اسمبلی امجد علی خان نے ناموس رسالتﷺ کی قرارداد پیش کی۔ 

قرارداد کے متن میں لکھا ہے کہ ایوان میں فرانسیسی سفیر کو ملک سے نکالنے کی قرارداد پر بحث کی جائے۔

امجد علی خان نے معاملے پر پارلیمنٹ کی خصوصی کمیٹی تشکیل دینے کی درخواست بھی کردی۔

وزیر پارلیمانی امور علی محمد خان نے معاملے پر پارلیمنٹ کی خصوصی کمیٹی بنانے کی تحریک پیش کی۔

جعمیت علماء اسلام (ف) کے رکن اسمبلی مولانا اسعد محمود کا کہنا تھا کہ ہنگامی اجلاس بلانا تھا تو اتنی زحمت بھی نہ کی کہ اپوزیشن کو اعتماد میں لیتے۔

انھوں نے کہا کہ آپ حکومت کے نہیں بلکہ ایوان کے اسپیکر ہیں، اسپیکر صاحب آپ کا طرز عمل جانبدارانہ ہے۔

سابق وزیراعظم اور مسلم لیگ (ن) کے رہنما شاہد خاقان عباسی نے اظہارِ خیال کرتے ہوئے کہا کہ یہ قرارداد مشاورت سے لائی جانی چاہیے تھی،

ان کا کہنا تھا کہ آپ نے قرارداد پیش کردی ہے، ہم اس پر غور کرکے آئیں گے، اس معاملے پر پورے ایوان پر مشتمل کمیٹی بنائی جائے۔

شاہد خاقان عباسی کا کہنا تھا کہ ایک گھنٹہ دے ہم قرارداد لے کر آئیں گے، جو قرارداد دیں گے اس پر بحث کروائیں گے۔

شاہد خاقان عباسی کا اسپیکر قومی اسمبلی سے مکالمہ ہوا جہاں شاہد خاقان عباسی نے کہا کہ آپ کو شرم نہیں آتی۔

اسپیکر نے شاہد خاقان عباسی کو جواب دیا کہ آپ ہمیشہ ایسا ہی کرتے ہیں، اپنی حد میں رہیں۔

پاکستان مسلم لیگ (ن) کے رکن اسمبلی احسن اقبال کا کہنا تھا کہ ہم حساس معاملے پر اکٹھے ہوئے ہیں، یہ قرارداد وزیراعظم کو پیش کرنی چاہیے تھی۔

احسن اقبال نے کہا کہ وزیرداخلہ، وزیر مذہبی امور سمیت دیگر وزرا ایوان میں موجود ہیں مگر کسی وزیر نے قرارداد پیش نہیں کی۔

لیگی رہنما کا کہنا تھا کہ توقع تھی کہ آج وزیراعظم اپنی کرسی پر بیٹھے ہوتے اور قرارداد خود پیش کرتے۔

ان کا یہ بھی کہنا تھا کہ حکومت نے جو بیانیہ اپنایا اس کے حوالے سے مجھ پر گولی چلی۔

احسن اقبال نے کہا کہ حکومت نے معاہدہ کیا تھا تو وزیراعظم کو یہاں ایوان میں آنا چاہیے تھا، اتنے اہم معاملے پر بحث ہورہی ہے ، وزیراعظم کہاں ہے؟

لاہور واقعے کے خلاف مفتی منیب الرحمٰن نے آج ملک بھر میں پہیہ جام ہڑتال کی اپیل کر دی۔

کراچی میں دیگر علماء کے ہمراہ پریس کانفرنس کرتے ہوئے مفتی منیب الرحمٰن نے لاہور واقعے کے خلاف آج ملک بھر میں شٹر ڈاؤن اور پہیہ جام ہڑتال کا اعلان کیا۔

دوسری جانب مولانا فضل الرحمٰن نے کہا ہے کہ ہم بھی اس معاملے میں مفتی منیب کے ساتھ ہیں۔ انہوں نے کہا کہ متحدہ مجلس عمل کے پلیٹ فارم سے اس واقعے کی مذمت کرتے ہیں۔

ادھر امیر جماعت اسلامی سراج الحق نے لاہور کی موجودہ صورت حال پر تحقیقات کے لیے عدالتی کمیشن قائم کرنے کا مطالبہ کر دیا۔

لاہور میں پریس کانفرنس کرتے ہوئے سراج الحق نے کہا کہ حکومت کی نیت شروع سے ٹھیک نہیں تھی، تمام سیاسی اور مذہبی قیادت کو اعتماد میں لیا جائے۔

واضح رہے کہ لاہور میں پولیس اور رینجرز نے یتیم خانہ چوک پر کئی روز سے قابض مظاہرین کو منتشر کرنے کیلئے آپریشن کیا ہے۔

آپریشن کے دوران یتیم خانہ چوک کی جانب جانے والے تمام راستے بند کردیے گئے

وزیر داخلہ شیخ رشید نے کہا ہے کہ کالعدم ٹی ایل پی سے حکومت کی بات چیت چل پڑی ہے۔ پہلی میٹنگ پنجاب حکومت نے کی ہے وہ کامیابی سے ہمکنار ہوئی ہے۔

وڈیو پیغام میں شیخ رشید کا کہنا ہے کہ بات چیت کا دوسرا مرحلہ صبح شروع ہوگا۔ انہوں نے یرغمال بنائے گئے11 پولیس اہلکاروں کو چھوڑ دیا ہے۔پولیس بھی پیچھے ہٹ چکی ہے

انہوں نے مزید کہا کہ کم و بیش 192 ناکوں میں سے ایک ناکہ رہ گیا تھا اس میں بھی بہتری آگئی ہے۔ دوسرے دور میں باقی معاملات بھی طے پا جانے کی امید ہے۔

شیخ رشید کا کہنا تھا کہ ٹی ایل پی کے لوگ مسجد رحمۃ اللعالمین کے اندر چلے گئے، پولیس بھی پیچھے ہٹ چکی ہے۔

وزیر داخلہ نے کہا کہ کہ سحری کے بعد بات چیت کا دوسرا دور شروع ہوگا۔

ادھر کراچی میں دیگر علماء کے ہمراہ پریس کانفرنس کرتے ہوئے مفتی منیب الرحمٰن نے لاہور واقعے کے خلاف آج ملک بھر میں شٹر ڈاؤن اور پہیہ جام ہڑتال کا اعلان کردیا ہے۔

دوسری طرف مولانا فضل الرحمٰن نے کہا ہے کہ ہم بھی اس معاملے میں مفتی منیب کے ساتھ ہیں۔ انہوں نے کہا کہ متحدہ مجلس عمل کے پلیٹ فارم سے اس واقعے کی مذمت کرتے ہیں