امریکی دھمکیوں پر ایران کا سخت ردِعمل: ‘بدزبانی کا جواب
عملی اقدام سے دیں گے’، عباس عراقچی
تہران: ایرانی وزیرِ خارجہ عباس عراقچی نے امریکی صدر ڈونلڈ ٹرمپ کے حالیہ بیان پر سخت ردِعمل ظاہر کرتے ہوئے کہا ہے کہ ایران کسی بھی توہین آمیز گفتگو کا جواب زبانی کلامی بحث کے بجائے ٹھوس عملی اقدامات سے دینے کی صلاحیت رکھتا ہے۔
سماجی رابطے کی ویب سائٹ ‘ایکس’ (سابقہ ٹویٹر) پر جاری اپنے ایک بیان میں ایرانی وزیرِ خارجہ کا کہنا تھا کہ ایک مہذب، غیور اور بہادر قوم کو تضحیک آمیز لہجے میں مخاطب کرنے سے اس کی تاریخی عظمت اور وقار کو کم نہیں کیا جا سکتا۔ انہوں نے واضح کیا کہ ایرانی عوام اپنی اعلیٰ اخلاقی اقدار، شائستگی اور قدیم ثقافت کی وجہ سے دنیا بھر میں ایک منفرد شناخت رکھتے ہیں۔
عباس عراقچی نے مزید لکھا:“ہم بدزبانی کا جواب بدزبانی سے دینے کے قائل نہیں، بلکہ ہم بے خوفی اور غیر معمولی جرأت کے ساتھ میدانِ عمل میں جواب دیتے ہیں۔“
ایرانی وزیرِ خارجہ کا یہ موقف امریکی صدر ڈونلڈ ٹرمپ کے اس دھمکی آمیز بیان کے بعد سامنے آیا ہے جس میں انہوں نے ایران پر دوبارہ حملے کا اشارہ دیا تھا۔ انقرہ میں نیٹو سربراہی اجلاس کے موقع پر صحافیوں سے گفتگو کرتے ہوئے امریکی صدر نے دعویٰ کیا تھا کہ واشنگٹن کی جانب سے ایران کو شدید نشانہ بنایا گیا ہے اور بدھ کی رات دوبارہ سخت کارروائی کا قوی امکان ہے۔ ڈونلڈ ٹرمپ نے مزید کہا تھا کہ وہ اب ایران کے ساتھ کسی قسم کے مذاکرات یا ڈیل کا ارادہ نہیں رکھتے۔
یاد رہے کہ اس سے قبل بھی امریکا نے آبنائے ہرمز میں بحری جہازوں پر ہونے والے حملوں کو بنیاد بنا کر ایران کے خلاف فوجی کارروائی کی تھی، جس کے بعد خطے میں کشیدگی شدید تر ہو گئی ہے۔
یہ بھی دیکھیں
یہ بھی دیکھیں
