کابینہ ڈویژن نے شہری کو وزیراعظم عمران خان کے تحائف کی تفصیلات دینے کا انفارمیشن کمیشن آف پاکستان کا حکم اسلام آباد ہائیکورٹ میں چیلنج کر دیا۔

اسلام آباد ہائیکورٹ کے جسٹس میاں گل حسن اورنگزیب نے کابینہ ڈویژن کی درخواست کی سماعت کی ، اسسٹنٹ اٹارنی جنرل عتیق الرحمٰن صدیقی عدالت میں پیش ہوئے۔

کابینہ ڈویژن نے اسلام آباد ہائیکورٹ میں دائر درخواست میں کہا کہ سربراہان مملکت کے درمیان تحائف کا تبادلہ بین الریاستی تعلقات کا عکاس ہوتا ہے، ایسے تحائف کی تفصیل کے اجراء سے میڈیا ہائپ اور غیر ضروری خبریں پھیلیں گی۔

درخواست میں کابینہ ڈویژن نے مزید کہا کہ بے بنیاد خبریں پھیلنے سے مختلف ممالک کے ساتھ تعلقات متاثر، ملکی وقار مجروح ہوگا۔

وفاقی حکومت نےعمران خان کو بطور وزیراعظم ملنے والے تحائف کو کلاسیفائیڈ قرار دیا۔

اسلام آباد ہائیکورٹ نے پاکستان انفارمیشن کمیشن اور شہری ابرار خالد کو نوٹس جاری کرتے ہوئے ان سے جواب طلب کرلیا